Tripura : Amrit Bharat station pali thawm ṭhat hna thawk

Tripura chief minister hlui, West Tripura MP ni lai Biplab Kumar Deb chuan Tripura-a Agartala, Dharmanagar, Kumarghat leh Udaipur-a Amrit Bharat Station Scheme hnuaia rel station pali thawm ṭhat leh tihchangtlung hna chak taka kalpui a nih thu a sawi.

MP chuan social media-a thuchhuah a siamah, prime minister Narendra Modi kaihhruaina hnuaiah rel station investment chu 6.5% in a pung tih a sawi a, facility changkang leh daihrei, service ṭha zawk pek leh passenger-te nuam zawka zin theihna tur ngaihtuah a nih thu a sawi. Hnathawh mek hmasawnna tarlangin, lift dah chu zawhfel a ni tawh a, meter 12 a sang overbridge leh Agartala rel station-a station thar building chu sak mek a ni tih a sawi bawk.

Deb chuan Dharmanagar station platform-a ṭhut hahdamna leh daidanna bang pawh sak zawh a ni tawh tih sawiin, overbridge meter 12 a sang leh escalator siam mekte pawhin hma an sawn tih a tarlang. Kumarghat rel station-a thawm ṭhat hna pawh tluang taka kalpui mek a ni a, Udaipur rel station-ah pawh waiting hall leh inthiarna facility siam ṭhat mek a ni. Heng project hi zawh fel a nih hunah chuan Tripura-a rel infrastructure a tichangtlung dawn a, inkalpawhna leh passenger-te tan a zangkhai tawh dawn a ni.