Manipur: Governor leh tribal hruaituten meeting nei

Manipur governor Ajay Kumar Bhalla chuan Thawhlehni khan Churachandpur district tlawhin, Kuki-Zo tribal community hruaitute nen meeting an nei. Meeting-ah hian district-a hmasawnna hna thawhte leh venhimna kenkawh dan an sawi ho a ni.

Home Department official chuan Governor leh a nupui chuan Torbung-a tualchhung buaina avanga chenna in chhuahsan, Internally Displaced Person (IDP)-te awm lailawkna camp an tlawh tih sawiin, Crèche Centre a hawn bakah, IDP-te mamawh tur a sem bawk a ni. Governor chuan NEET-2025-a in ziak tling zirlai pahnih leh relief camp-a zirlai naupang zirna lama ti ṭhate lawmpuina a hlan bawk.

Kuki Students' Organization leh khawtlang hruaitute chuan Governor hnenah an huam chhunga multipurpose hall sakna tur memoranda an theh lut bawk a ni. Governor hi MLA, Civil Society Organisation leh zirlai hruaitu aiawhte nen inbiakna neiin, Kuki-Zo Council (KZC) aiawhte chuan zirna lama harsatna an tawhte, inbiakpawhna leh inkaihhruainaa buaina an tawh chungchangah memoranda an theh lut bawk a ni.

KZC hruaitute chuan Governor chu mipui hamṭhatna tura hma lak sak turin an ngen a, Zomi Council hruaitute pawhin IDP-te sawn chhuah an nih dan leh an hamṭhatna tura hmalakna kawngah thil lungawithlak loh a awm thu sawiin, Governor chu a ṭul anga hma la turin an ngen bawk. Governor chuan an harsatna tawhte hriatthiampuiin, hma lak vat a ni dawh tih a tiam a ni.