Arunachal : Minister-in ruihhlo do leh HIV awareness campaign hawng

Arunachal Pradesh health and family welfare minister Biyuram Wahge chuan state-a district zawng zawnga tualchhung ṭawng lemchan (drama) hmanga ruihhlo hmansual leh HIV/AIDS dona, awareness campaign neihna tur a hawng.

Campaign-ah hian '“Nashye Se Inkar, Zindagi Se Pyaar' (Say No to Drugs, Yes to Life) tih thupuiah hman a ni a, ruihhlo chungchangah inzirtirna mumal leh awmze nei zawka kalpui tum a ni. Wahge chuan drama chan hmanga inzirtirna neih chu ṭhalaite zingah nghawng ṭha tak nei thei tur niin a sawi.

Minister chuan ṭhangthar zinga ruihhlo hman sualna pung zel chu ngaihtuah tham a ni tih sawiin, HIV vei tam tak pawh inchiuna (syringe) in hman ṭawm aṭanga kai an nih thu a sawi. Tualchhung ṭawng hmanga thuziak ngaihnawm takte leh, drama chan chuan ruihhlo hman sualnain nghawng ṭha lo a neihte a tarlang thei dawn tih a sawi. Nu leh pate pawhin an fate ruihhlo laka fihlim turin hma an lak a ngai a ni, tiin Wahge chuan a sawi bawk.

Campaign chu ruihhlo laka fihlim tura inzirtirna mai ni loin, ṭhalai zinga artist thiam tak takten an thiamna an hman ṭangkai theihna tur leh an in pholan theihna tur platform pawimawh tak a ni, a ti. Arunachal Pradesh hian ruihhlo vangin buaina an tawk mek a, kum 2019-a national survey-a a landanin, India ramah ruihhlo hmangsual tam lamah pathumna an ni. He harsatna sutkianna atan state sorkar chuan psychoactive substance policy siamin, Arunachal Pradesh Drug De-Addiction Society (APDDS) leh rehabilitation centre a din bawk a ni.