Assam : AASU-in pension tawh chhawr tum sawisel

All Assam Students Union (AASU) chuan Assam sorkarin model college thara zirtirtu pension tawhte lak a tum chu sawiselin, ṭhalai thiam tak tak sang chuang ten hna an neih loh phah dawn niin an sawi. AASU chuan Pathianni khan teachers' organization nen meeting neiin, sorkarin model college-a thawk tur policy a siam chungchang an sawi ho.

Meeting-ah hian zirtirtu pension tawhte model college thara thawk tura sorkarin thutlukna a siam chu an dodal a, hnathawk tura an lakte probation system pawh hnawlin, AASU chuan zirtirtu tawnhriat ngah tak takte lakna tur kawng dang siam a rawt bawk.

AASU Central Committee president Utpal Sarma chuan, state sorkarin zirtirtu pension tawhte hna thawk tura lak chungchanga thutlukna a siam chu hnukkir tura ngenin, ṭhalai zinga zirtirtu thiam tak takte chu ngaih pawimawh hmasak a ṭul thu a sawi.

Sarma chuan kum 8-10 chhung zirtirtu hna lo thawk tawhte chuan classroom leh zirna in kaihhruai kawngah tawnhriat tam tak an nei tawh tih sawiin, Assistant Professor atan a thiam leh tling, ṭhalai zinga hna nei lote lak chu a pawimawh thu a sawi. Sorkar thutlukna chu thil dik lo a ni tiin, ṭhangtharten hna ṭha tak an chan phah dawn tih an tarlang. Zirlai pawl chuan model college-a thawk tura lakte chu kum thum chhung probation-a dah ai chuan, UGC standard nena inmila lak bakah hlawh pe turin sorkar an phut bawk.