Assam : National Games thleng turin inbuatsaih

Assam chief minister Himanta Biswa Sarma chuan Inrinni khan Assam Cricket Association Cricket Academy leh Guwahati Town Club Football Academy chu Fulung, North Guwahati-ah hawngin, hawnna inkhawmah hian kum 2007 hnuah National Games 2027 thleng tura inbuatsaihna an kalpui mek thu a sawi.

Chief Minister chuan National Games thleng tur hian inbuatsaihna nasa taka kalpui a ni tih sawiin, kum 2026-a inthlan an neih zawhah chiah ṭan a ni dawn tih thuthar lakhawmtute a hrilh. Kum 2026-ah assembly inthlan a awm dawn avangin National Games chu 2027-ah sawn hlat a nih thu a sawi bawk a ni. CM Sarma chuan infiamna hmanga inelna zawng zawng chu Guwahati-ah neih a ni dawn tih sawiin, final pawh neih a ni nghal dawn a ni, a ti.

Sorkar thuchhuah tarlan danin CM-in a hawn tak, Assam Cricket Association Cricket Academy campus-ah hian practice wicket 10 a awm a, cricket ground-ah hian centre wicket panga awmin, ramchhunga indoor cricket hall lian ber pawl a ni. Cricket khel ṭhinte tan chenna hmun tur facility a awm bawk a; technical director, coach leh staff dang awmna tur an awm bawk. Guwahati Town Club Football Academy-ah hian football ground pahnih a awm a, hostel khum 60 awmna, football pavilion leh indoor games la thlen theihna tura ruahman a ni bawk. Academy pahnihah hian coach ṭha ber berte kaihhruaina hnuaiah training pek a ni ang.