Meghalaya : Indo-Bangladesh ramri-ah 'Operation Alert' kalpui

Border Security Force (BSF) Meghalaya Frontier chuan Independence Day lo awm tur denchhenin Indo-Bangladesh ramri, Meghalaya-ah 'Operation Alert' an kalpui. An beihpui thlakna hian August 10-16 chhung a huam dawn a, state police leh enforcement agency-te nen ṭangkawpin ramriah venhimna khauh zawkin an kalpui a ni.

Beihpui thlakna hi hlawhtling taka kalpui a nih theihna turin BSF chuan post pawimawh tak takah sipai dah belhin, frontier leh sector headquarters senior officer-te chu ramri hmun hrang hrangah an hmalakna endik leh kaihruai tura sawn chhuah an ni bawk. An hmalakna kalpui zingah hian darkar 24 chhung patrol neih, hmung hrang hranga checkpoint sawi lawk loa endikte pawh a tel.

Bawng tawlhruk, dan loa ramria luh ruk, leh bungraw phurh luh ven kawngah nasa takin hma an la. Security force-te chuan ngawrh takin patrol an kalpui mek a, night vision gear leh mobile patrol unit hmangin venhim ngai zual laite an enfiah reng bawk.

Ramria awm mek inspector general O.P. Upadhyay chuan thuchhuah siamin, Independence Day chu hmelmate leh pawikhawihna thlen tam ṭhin hunlai a nih thu sawiin, BSF-in ram venhimna atana an inpeknaah lawmthu a sawi bawk.