Manipur : Ramri buaina chungchangah MLA 4-in Governor hmu

Manipur-a Naga People's Front (NPF) MLA pathum Awangbou Newmai, Khashim Vashum, leh Leishiyo Keishing bakah Independent MLA J. Kumo Sha-te chuan governor Ajay Kumar Bhalla chu Raj Bhavan-ah hmuin, Free Movement Regime (FMR) leh ramri hung chungchanga buaina awmte Governor hi an hrilh a, a ṭul anga hma la turin an ngen.

Sorkar laipui chuan hmarchhak biala Myanmar nena inri state pali -Mizoram, Manipur, Nagaland leh Arunachal Prades-a ramri 1,643 a thui FMR chu titawpin, ramri hung hna thawh mek a ni bawk. FMR hnuaiah hian India-Myanmar inrina hrul, km 16 huam china chengte chu visa ngai loin ramri kaltlanga an kal tawn phalsak an ni.

FMR tihtawp hi state palia political party leh pawl eng emaw zatin an dodal a, sorkar chu a thutlukna siam sut leh turin an nawr a ni. Hei bakah ramri hung pawh thlawp lo tam tak an awm bawk. FMR tihtawp a nih hnuah border crossing point 43 siam a ni a, Assam Rifle-in border pass a pek chhuahte chauh an kal tlang thei ang.

MLA-te chuan Governor hnenah ramri hung hna thawh meka buaina awmte chinfel dan ngaihtuah pui turin an ngen a ni.

Naga pawl lian, United Naga Council (UNC) chuan ramri hung hna thawh mek titawp tur leh, FMR tihtawp pawh sut leh tura prime minister Narendra Modi an phutna pawh a tichhuak bawk. An thil phut hi ngaihtuah a nih loh chuan Naga hill district-ah tiam chin awm loin national highway an dang dawn tih an sawi.