Assam : Sorkar hnathawkte book allowance pe dawn

Assam chief minister Himanta Biswa Sarma chuan kumin November thla hian state sorkar hnuaia hnathawkte chu book allowance, Rs 1,000 ṭheuh pek an ni dawn tih a sawi. Hemia atana sum sen tur hi Rs vbc 40 vel a tling dawn a ni.

Nimina press conference a neihah, Chief Minister chuan he thutlukna hi state cabinet meeting-ah siam a ni tih a sawi a, sorkarin kum 2025 chu 'Year or Books' atana a pawm thu leh, hmachhawp hrang hrangte siam a nih thu a sawi bawk. "November thlaah sorkar hnathawk zawng zawngte chu an hlawh bakah lehkhabu leina tur Rs 1,000 ṭheuh pek belh an ni ang," a ti. Hei bakah ṭhangthar zinga thuziak mi 1,000 thlan chhuahte chu puihna Rs 25,000 ṭheuh pek a ni dawn tih a puang bawk. 'Year of Books ' hmang chhung hian sorkar function hrang hrangah thilpel inpek turte chu lehkhabu pianhmang anga siam zel tur a ni tih CM chuan a sawi .

State cabinet chuan Bhupen Hazarika chanchin ziahna bu tihchhuah a rel a, hei hi state chhung bakah ram puma mi pawimawh hrang hrang leh zirna inahte sem an tum a ni.

Assam Prakashan Parishad-in a pawm book fair buatsaihtute chu district headquarters-ah Rs nuai 5 leh sub-district headquarters-ah RS nuai 2.5 zel pek a ni ang.

Cabinet meeting chuan Anganwadi helper aṭanga Anganwadi worker-a kaisan theih chin, kum 45 china bithliah chu kkum 50-ah tisang a, hei hi Angawadi Helper-ten kaisan theih remchang an ngah theihna tur leh, an service tihchangtlunna atan tih a nih thu CM chuan a sawi. Hei bakah private investment leh hna thawh tur tam zawk a awm theihna atan cabinet chuan investment pali, Rs vbc 1,843 an pawm bawk a, hemi hmang hian hna k850 vel siam a ni dawn ni. Assam-a investment tihtum company-te chu Valley Strong Cements , Star Cement , Maxim Infrastructure and Real Estate leh Varun Beverages te an nih thu Sarma chuan a sawi.