Assam : Sorkarin special arms license scheme hawng

Assam sorkar chuan hmun ralṭi leh him lo zual hmuna cheng, khua leh tui dik takten silai licence an dilna kawnga special scheme a siam. Hemi atan hian online portal siamin, hei hi silai license diltuten awlsam zawka dilna an siam theihna turin a ti a ni.

Chief minister Himanta Biswa Sarma chuan Assam khua leh tui diktak ten silai licence awlsam zawka an dil theihna tur online portal tlangzarh a nih thu puangin, he portal kaltlang hian khua leh tui, hmun ralṭi zuala chengte chuan silai license an dil thei dawn a, uluk taka an dilna enfiah a nih hnuah silai license pek chhuah a ni ang, a ti.

Chief Minister chuan license dil thei tur chin criteria pawimawh tak tak tarlangin, Assam-a piang leh seilian emaw khua leh tui dik takte emaw chauhin silai license hi an dil thei dawn a ni. Diltute chu district hotute emaw security agency-te’n emaw hmun ralṭi, harsatna thlen ṭhinna hmun tia an pawmah an cheng tur a ni bawk. An dilna hi venhimna dinhmun enfiah a nih hnuah tualchhung thuneitu, police leh intelligence agency-te chuan uluk takin an ennawn leh ang. Hemi hnuah District Magistrate-in thutlukna a siam dawn a ni. Silai license hi pek chhuah a nih hnuah midang hnena hlanchhawn theih a ni dawn loa, a hmanna tura hmang lo emaw pawikhawihna emaw atana hmang an awm chuan an license tihtawp sak an ni ang.