Tripura-ah naupang inneih tirna a hluar

Tripura-ah naupang inneih tirna a la hluar chhunzawm hle a, a thlen tamna ber Sepahijala district-ah thla thum chhungin case 103 a awm tawh tih Thawhlehni khan official chuan a tarlang. District thuneitute chuan 'Mission Sankalp' hmalakna hnuaiah naupang inneihtir an tum 101 chu hlawhtling takin an lo dansak tawh a ni.

Tripura hi ram pumah naupang inneih tirna thlen tamna state pathumna an ni tih National Family Survey report chuan a tarlang.

Social Welfare and Social Education Department director Tapan Kumar Das chuan naupang inneih tirna chu Tripura-a harsatna lian ber zinga mi a nih thu sawiin, retheihna chu a chhan bulpui ber a ni, a ti. Ziak leh chhiar thiam lohna, vantlang inpuih tawnna awm ṭha lo leh social media-in nghawng a neihte chu a chhan dang a nih thu a sawi bawk.

Das chuan thingtlang hmun tam takah hmeichhiate dinhmun a la hniamin phurrita ngaihna a san thu a sawi a, zirna kawngah pawh hmeichhiate chu an nu leh paten an ngaihthah tih a sawi. Harsatna chingfel tur hian Social Welfare Department chuan district thuneitute nen ṭangkawpin kawng hrang hrangin hma an la a, sorkar laipuiin 'Beti Bachao Beti Padhao' scheme a kalpui hnuaiah naupang inneih tirna in harsatna a thlen dan inzirtirna campaign pawh neih turin ruahman a ni, a ti.