Sorkar hna thawk turin mi nuai 1 chuang lak an ni tawh : Assam CM

Assam chief minister Himanta Biswa Sarma chuan nimin khan Assam-a BJP sorkar hnuaiah sokar hna thawk turin mi 1,21,182 lak an ni tawh tih sawiin, Assam ṭhalaite tana hna siam tura an lo intiamna chu an ti hlawhtling zel tih a sawi.

Chief Minister chuan nimin bik khan engineering leh polytechnic college-a zirtirtu lak thar mi 342 te hnenah appointment letter pek chhuah a nih thu X-ah a tarlang bawk. Hei hian state chhunga technical institution-a zirnate a ti changtlungin a tih ṭhat phah ngei tur thu a sawi a ni.

Sarma chuan October thlaah appointment letter hi 40,000 - 50,000 sem chhuah a ni leh dawn tih sawiin, hemi nen hian a kaihhruai sorkarin kum nga chhungin sorkar hna thawk a lak chu nuai 1.75 a tling tawh dawn a ni, a ti. Sorkar hna thawk tur laknaah pawh dik leh felfai, langtlang taka kalpui a ni a, a tlingte pawh dik taka tling an nih thu Chief Minister chuan a sawi. Hna lak leh zel turah pawh dik taka lak zel a ni dawn a ni, ati.