Manipur : Governor-in cashless transport leh e-license service hawng

Manipur governor Ajay Kumar Bhalla chuan transport service atana cashless payment system bakah electronic Driving License (eDL) leh electronic Registration Certificates (eRC) chu Ningani khan Raj Bhavan-ah a hawng.

Raj Bhavan chuan Transport Department-in an service kaihhnawiha digital transaction hmanna tura an hmalakna hi state mipui tan a ṭangkai dawn a, rintlak leh langtlang tak a ni dawn bawk tih a sawi.

Governor chuan Transport Department chu an thawhrimna leh inrelbawlna tihchakna atan bakah, khua leh tui hmasawnna kawnga technology changkang hman an ngaipawimawh chu a fak hle. Transport Secretary chuan national Parivahan Sewa portal kaltlangin service 32 kalpui a ni tawh tih sawiin, service dang pawh hman theih a ni thuai dawn tih a tarlang.

July 18, 2025 aṭang khan state mipuite chuan transport leh a kaihhnawih fee zawng zawng chu POS terminal leh online payment system hrang hrang, debit/credit card, UPI leh online payment dang hmangin an pe thei tawh. eDL leh eRC hi state pumah August 1 aṭangin hman ṭan theih a ni dawn a, mipuite chuan an driver license leh registration certificate-te chu DigiLocker leh mParivahan app-ah an dah ṭha thei tawh dawn a ni.