Tripura : Naupang inneih venna atan pre-marriage registration kalpui dawn

Tripura chief minister Manik Saha chuan innei thar tur awm apiangte chu inneih buatsaih a nih hmain sorkarah an in ziahluhna tur duan an tum tih Ningani khan a sawi. Hei hi naupang inneih tirna thleng ṭhin venna tura tih a ni.

Chief Minister Saha chuan Gandhigram Higher Secondary School, Bamutia Block-a Drug-Free India Campaign a neihnaah he thu hi a sawi. Innei turten inneih hmaa registration an tihah hian kum zat lanna tur document an neih a ngai dawn a, heta ṭang hian kum tling loa inneih tir awm ṭhin pawh an ven theih an beisei.

Saha chuan innei thar turte chuan birth certificate an nei ngei tur a ni a, an in ziahluh hmain hmeichhia kum 18 leh mipa kum 21 chin an ni ngei em tih finfiahna an nei tur a ni, a ti. He hmalakna hian khawtlang leh sakhaw inneihna kalpui a nih hmain dan anga venhimna siam kawngah a pui dawn tih a sawi.

CM chuan state chhunga ruihhlo hman sual chungchanga buaina pawh sawilangin, tun hmain ruihhlo leh a kaihhnawih hmansual vanga buaina an tawh ngai loh thu a sawi. Mahse kum 40 liam ta aṭang khan ruihhlo hman sual kawngah an state chuan chhiat lam a pan zel tih a sawi. Ruihhlo tawlhruknaa inhnamhnawihte chu hrem loha chhuah an ni dawn lo tih sawiin, sorkarin ruihhlo chungchanga zero-tolerance policy a kalpui pawh a sawi nawn leh. Naupang inneih leh ruihhlo hmansual kawnga inzirtirna neih a pawimawh leh a ṭul thu a sawi a ni.