Tipra Motha hotuin Bihar-a electoral roll ennawn dan ang duh ve

Tipra Motha hotu, Pradyot Kishore Manikya Debbarma chuan Bihar-a electroral roll ennawnna neih mek ang chu Tripura-ah 2028 assembly inthlan hma ngeia neih ve a phut.

Bihar assembly inthlan hi kumin kumtawp lamah neih a ni dawn a, inthlan neih hma hian Election Commission (EC) chuan a hranpa bika elecotral roll ennawnna, Special Intensive Revision (SIR) a kalpui mek a ni. Roll ennawna kalpui mekah hian voter registration tihna turin khuahkhirhna khauh tak siam a ni a, hei hi eptu party te chuan an sawisel thung.

Debbarma chuan, "Hetiang tak hi hmarchhakah,a bikin Tripura-ah tih ve a ngai. Officer-ah pawh state leilung fa Tiprasa mite telh an ni ve bawk tur a ni," a ti. Bihar anga roll ennawnna uluk tak neih chu hmarchhak state te chuan Bihar-a uluk taka roll ennawna kalpui ang chu an phu ve a ni tiin, 'EC tan eng vanga Bihar hi pawimawh viau a, hmarchhak bial a pawimawh loh chhan hi ka hrethiam lo a ni. India fate vek kan ni lawm ni?" a ti. Tripra Motha MLA-te chuan EC-ah ngenna an thlen a ngai tih a sawi. Hmarchhak state hrang hranga regional political party-te pawh 'Bihar model' roll revision neih ang hi hmarchhak state zawng zawnga kalpui tura nawr turin ti bawk.

Bihar-a Special Intensive Revision (SIR) neih mekah hian in tinah roll-a awmte enfiah hna hi kalpuiin, hei hi kum 20 chhunga khawpui cheng leh pem lut pung chak lutuk vanga kalpui ngai a nih thu EC chuan a sawi. 2003-a voter list a awm hman lo, voter te chu khua leh tui dik tak an ni tih finfiahna tur document 11 tarlan zinga pakhat theh lut tura tih an ni a, document an pawm zingah hian Aadhaar, ration leh MGNREGA card erawh a tel lo.

Tipra Motha hotu chuan Tripura-a tribal ramte chu Bangladesh miten an lei fo tih sawiin, an state chuan a ram chu tlem tlemin a hloh zel a ni, a ti. Ram dang mite laka an ram an hloh fo chungchangah Congress leh BJP chu puhin, politics lama hlawkna an neih duh avangin state-in a tuar a ni,a ti. Bangladesh miin tribal mi ram lei a, a hminga a dah lehna document te pawh a nei tih a sawi.