Sikkim : India-a digital nomad village hmasa Yakten

Sikkim khawchhak lam, Pakyong district huamchhunga awm, Yakten khua chu Thawhṭanni khan India rama digital nomad village hmasa berah official-a puan a ni.

Office leh hmunpui lama kal kher lo a, hmun dang aṭanga digital hmanga hna thawh digital nomad hi Covid-19 hripui leng vanga inkhung beh a, in aṭanga hna thawh a ngaih aṭang khan a lar chho hle a ni. Tun hnuah pawh mi tam tak chu office kal pangngai ang ni loin, hmun thengthaw leh hahdam tak aṭanga hna thawh duh zawk tam tak an awm tawh. Heng mite tan hian Yaken khua hi insiamremin worker, freelancer, leh digital entrepreneur-te tan kawng an hawng ta a ni.

Yaken khua hi digital hmanga hna thawktute tana pan tlaka siam tumin Sikkim sorkar chuan Asian Development Bank (ADB) thawhpuiin hma a la a, a khua pantute hian high-speed internet an hmang thei a, homestay nuam tak tak bakah hna thawhna tur hmun nuam takte an siam bawk. Pakyong Airport aṭanga km 10 vel chauha hlaah a awm.

Hna thawhna atana pantuten harsatna an neih lohna turin Airtel leh Jio mobile broadband chak tak a awm a, khua leh a chhehvel khawi hmunah pawh an hna thawh duhna hmunah buaina an neih lohna turin network pawh a ṭha hle. Homestay tinah pawh Wi-Fi awm vek bawk a ni.