Meghalaya : Khasi hnam dik lo taka puhtu lakah FIR ziak lut turin ngen

Meghalaya-a Khasi ṭhalai pawl, Hynniewtrep Youth Council (HYC) chuan Lumdiengjri police-te chu astrologer Sushil Guru leh YouTuber Raghav Sharma ten Meghalaya tribal community-te huatthlala leh dik lo taka an puh avangin an laka FIR ziak lut turin an ngen.

HYC chuan video hi YouTube channel Supertalks tihah an upload tih sawiin, Sushil Guru hian Meghalaya-a tribal mite chu mihring sa ei mi leh mihringpuite inthawina atan an hlan ṭhin tih a sawi niin an tarlang. Advocate leh HYC education secretary ni bawk Enlang Sawian chuan council aiawhin complaint hi a thehlut a ni. Complaint a thehluhah hian video-a an thil tihchhuah chu thu dik lo leh awmze nei lo, state leilung fate tih hmingchhiat tumna a ni tih a tarlang.

Sawian chuan he video hian tribal community-te tih hmingchhiat tumna a nih bakah, vantlang ralmuanna leh inremna ti chhe thei thil a ni tih a sawilang bawk. Complaint hi Bharatiya Nyaya Sanhita, 2023-a Section 196 rinchhana siam a ni. An thiltih avanga hrem an nih ngei theihna turin police-te chu astrologer leh YouTuber pahnih lakah dan anga thubuai siamsak turin a ngen. Ngaihdan dik lo hmanga thudik lo an thehdarh chu tribal mipuite tan a rilru natthlak tih a sawi bawk. Tun dinhmunah Lumdiengjri Police-te chuan he complaint chungchangah hian thuchhuah an la nei lo thung.