Manipur : Imphal Airport-ah Digital ILP Registration System hmang dawn

Manipur sorkar chuan state tlawhtute awlsam zawka hriat theihna tur leh digital lama hmasawnna atan, digital Inner Line Permit (ILP) registration system chu Imphal Airport-ah a vawi khatna atan hman a ni dawn. He hmalakna hi ILP system, tunlai khawvel thiamna leh changkang zawka kalpuina tur a ni dawn a, a hmangtute tan pawh hman nuam leh awlsam zawk a ni dawn a ni. He system hi Jiribam leh Mao luhnaah pawh hman a ni ang.

Chief secretary Prashant Kumar Singh, IAS bakah official-te leh Airport Director chuan ILP kiosk system dah thar chu kar liamta Thawhlehni khan enchhinna an lo nei tawh a, digital kiosk hian permit registration hi minute thum chhungin a hrechhuak thei a ni. He hmalakna hian Manipur-a lut tur khualzinte tan chiang zawka hriatna lam a ti changtlung dawn a, state-in dan a siam pawh a ti chak dawn nia sawi a ni.

Manipur hian kum 2019 aṭang khan Inner Line Permit (ILP) system hi hmangin, official travel document hi state sorkar tihchhuah a ni a, India khua leh tui zingah hun bituk chhunga Manipur tlawh tur an awmin phalna a pe ṭhin. ILP hnuaiah hian permit chi ruk pek chhuah mek niin, Special Permit (Sorkar contractor, investor, state chhunga sumdawnna hmun neite tan), Regular Permit (state tlawh fote tan), Temporary (khualzin, sumdawngte tan), leh Labour (contractor, firm, company), Half-Yearly Working Permit leh Annual Working Permit te an ni.