Assam : PM Modi-a'n Rs vbc 8,000 infra project hawng dawn

Prime minister Narendra Modi chuan September 8 hian 'Sudhakantha' Dr Bhupen Hazarika piancham pualin Assam a tlawh dawn a, mega infrastructure project eng emaw zat thawhna tur lungphum a phum dawn.

Prime Minister-in project a hawn tur zingah hian Darrang medical college sakna, Brahmaputra chunga lei dawh, Darrang-a Kuruwa leh Guwahati-a Narengi inkalpawhna tur bakah Guwahati ring road siamna turte a tel. Heng project hrang hrangte hi Rs vbc 8,000 sen ngaihna tura ruahman a ni.

Project hawn turte hi Inrinni liam ta khan chief minister Himanta Biswa Sarma-a'n Magaldi-a medical college sakna hmun tur a tlawh ṭumin a puang a ni. Medical college thar turah hian khum 430 dah a ni dawn a, a sakna hmun tur atan ram bigha 146 dah a ni tawh a, Rs vbc 572 senga sak tur a ni. CM Sarma hi MP leh State BJP president Dilip Saikia, MLA MLAs Dr Paramananda Rajbongshi, Basanta Das leh Diganta Kalita bakah, MLA hlui Gurujyoti Das, leh State PWD senior official-te leh Darrang district administrationten an ṭawiawm.

CM Sarma chuan thuthar thehdarhtute a kawmnaah medical college sakna hmun tur hi tih fel a nih dawn tawh thu leh, Prime Minister hnena thlen thuai a nih tur thu a sawi. Prime Minister hian Numaligarg a tlawh hmasa dawn a, Guwahati-a Bhupenda piancham lawmnaa a kal hmain public meeting a nei dawn bawk.