Assam : Dan loa Paikan reserve forest-a khawsate chhuah tir

Assam sorkar chuan Inrinni liam ta khan Goalpara district-a Paikan Reserve Forest huamchhung, hectare 140 chuanga zaua dan lo a khawsate a hnawt chhuak.

District thuneitute chuan dan loa awmte chhuah tirna, eviction drive hi Paikan Reserve Forest-a Bidyapara leh Betbari area-ah kalpui phawt a ni tih an sawi. He hmunah hian kum tam tak chhung chu phalna nei loin chhungkaw za tel an khawsa tawh a ni.

Eviction drive neihnaah hian Assam Forest Department leh state police joint team thawk chhuakin, bulldozer bakah excavator an hmang a, security force lamin an pui bawk. Goalpara Divisional Forest Officer (DFO) Tejash Maiswami chuan eviction drive an neihnaah hian dan loa in sak 2,700 vel awmin, chhungkaw 1,080 an awm a, an in sakte tih chhiat vek a nih thu a sawi. He hmuna khawsate hi nikum December thla khan insawnchhuak tura hriattir an ni tawh a, kumin June thlaaah hriattir nawn leh an ni bawk a ni, a ti.

"Hriattirna pek hnuah mi tam tak chu an insawnchhuak a, a la chhuak duh lote in chu kan tih chhiatsak a ni," tiin Maiswami chuan a sawi. High Court thupeka he thil hi tih an nih thu leh, forest ram hectare 790 vela zau chu an thenfai tawh thu a sawi.