Manipur : IDP-in state sorkar ruahmanna siam duh lo

Manipur tualchhung buaina thleng vanga Kangchup area-a tlanchhia, internally displaced person ( IDP) chuan state sorkarin an in dintharna atana chhungkaw pakhat tan Rs 75,000 zel pek a tum chu an duh lo.

State sorkar chuan Kangchup area-a IDP hnenah buaina chhuak vanga an in chhiate thuam ṭhatna atan Rs 75,000 pek a, July 15-ah an in lamah kir leh vek turin an ti a ni. Mahse an in dinhmunte an enfiah hnuah, IDP te hian sorkarin sum a pek tum hi an duh lo a, awmzia a nei tham lo tih an sawi.

Kangchup Khrang khaw mite hi buaina chhuak avangin kum hnih chuang an khua aṭang hian an tlanchhe tawh a ni. An in tlanchhiatsante hi security force-ten an veng a ni. Sorkarin ruahmanna a siam hnuah an inte hi enfiahin, in siamṭhatna turin awmzia a nei tham lo a, an mamawh a phuhru dawn lo tih an sawi.

Manipur sorkar chuan state chhung dinhmunin ziaawm lam a pan chhoh avangin kumin December-ah chuan relief camp-te chu khar vek a tum tawh tih a puang. Relief camp hrang hranga awm mekte hi a tahtawlin an in lama an kir dan tur ngaihtuah sak an ni ang. A hmasa berah chuan in halralsak ni lote chu July 15 aṭangin venhimna ṭha tak hnuaia an in lama kir tir tum an ni.