Nagaland : Rajya Sabha MP hoin central scheme ennawn

Nagaland-a Mon district-ah District Development Coordination Monitoring Committee (DISHA) meeting chu Rajya Sabha MP Phangnon Konyak hoin Ningani khan neih a ni a, sorkar laipui scheme hrang hrang ennawnna an neih bakah, district-a hmasawnna hnathawh kalpui mek thlir hona hun an hmang.

Meeting-a an sawi ho zingah hian lead bank awareness campaign dinhmun, PMAY-G leh PMAY-HFA -U hnuaia fund semchhuah dan, Tuberculosis (TB), Japanese Encephalitis leh sickle cell anemia screening camp buatsaih bakah, Mon district-a medical staff indaih loh chungchangte a tel. Hei bakah PWD (R&B) department hnuaiah kawng siam project hnathawh dan thlir ho a ni a, Jal Jeevan Mission (JJM) scheme hman chungchanga harsatna awmte an sawi ho bawk.

Chairman chuan hlawhtlinna ṭhenkhat, RD block pahnih-a 100% Aadhaar coverage leh, JJM hnuaia hmasawnna langsar tak tak awmte chu lawmawm a tih rualin, meeting neihnaa Head of Department (HOD) an tel ve loh chungchangah zawhna siamin, an tel loh chhan thehlut turin a hriattir.