Meghalaya : Union Finance Minister-in Polo Commercial Complex hawng

Union finance minister Nirmala Sitharaman chuan Ningani khan Rs vbc 100 senga sak, Polo Commercial Complex, Shillong ami a hawng.

He complex hi Meghalaya-a Smart Cities Mission hnuaia shopping mall lian sak hmasa ber a ni. Chief minister Conrad K. Sangma chuan commercial complex hi tender process hmangin private operator hnenah hlan a ni dawn tih a sawi.

Commercial complex thar hi acre 1.26 a zau niin, retail outlet 109 a awm a, office unit pariat awmin, food court leh gaming zone sqft 15,000 a awm bakah, lirthei ke pali nei 86 dahna tur leh ke pahnih nei 50 dahna tur a awm bawk. Lift panga awmin, escalator 12, emergency exit leh cctv camera 110 dah a ni. Rooftop solar panel, ruahtui khawlna leh sewage-treatment system hman a ni bawk.

Sitharaman hi ni li chhung Meghalaya-ah hian a cham dawn a, Prime Minister’s Internship Scheme (PMIS) chungchang sawi hona meeting pawh a kaihruai nghal bawk.

He scheme hian thla 12 chhung atan paid internship pein, thla tin sum lama ṭanpuina Rs 5,000 leh one-time grant Rs 6,000 a pechhuak bawk. He scheme hi thiam thil pho chhuahna hun ṭha leh India ram hma hun zel atan a ṭangkai dawn tih Sitharaman chuan a sawi a ni.

Finance Minister hian Umiam dil thawm ṭhat a tlawh dawn bawk a; meeting, incentive, conference leh exhibitions (MICE) a kaihruai dawn a, Mawkhanu-ah cultural club a hawng bawk ang. Hei bakah football stadium mi 40,000 lenna a hawng dawn a, virtual hmangin digital library 75, Rs vbc 162 senga sakte pawh a hawng dawn a ni. Shillong, Jowai, Byrnihat leh Tura-a hmeichhe hnathawkte hostel sakna tur lungphum a phum dawn bakah, Meghalaya Film Tourism Policy 2025 khuhhawnna a nei bawk ang.