Sikkim: CM hmathlir hmangin tourism a ṭhanglian zel - STDC Chairman

Sikkim Tourism Development Corporation (STDC) chairman Lukendra Rasaily chuan, chief minister Prem Sing Tamang kaihhruaina leh hmathlir ropui tak hnuaiah Sikkim tourism sector-ah hmasawnna leh ṭhanlenna tam tak a awm thu a sawi. Tunhnaia hmasawnna an neihte tarlangin, Sikkim tourism industry tih chakna atana CM Tamang inpeknate a sawi lang bawk.

Tun hnaia khualzin tana buatsaih, lirthei mi 22 lenna chu passenger indaih lohna leh khuain a zir loh avangin duhthusam anga kalpui theih a nih loh thu tarlangin, sorkar chuan state tlawhtute tan service ṭha zawk pek zel an tum tih Rasaily chuan a sawi. Chief Minister chu ṭhalaite hmakhaw ngaitu leh Self-Help Group (SHG) chawilartu a nih thu sawiin, tualchhung entrepreneur-te pawhin hun ṭha zawk an neih zel thu a tarlang.

Rasaily chuan ram dang aṭanga bungraw lakluh rinchhan ai chuan, Sikkim tualchhung mipui kutchhuak thlawp leh phochhuah a pawimawh thu sawiin, "Kutthemthiamte hian platform ṭha an mamawh a, an thil siamchhuahte kan chawisang tur a ni," a ti. "Sikkim ṭhalaite chuan an thiam thil hmanga eizawnna an dap nasa hle tawh a, kut hnathawh aṭanga mikhual lo enkawl dan thlengin hma an sawn tawh a, anmahni thlawp hi kan mawhphurhna a ni," a ti bawk. Tourism professional-te chawisang tura Chief Minister-in thlawpna ṭha tak a pe chu a fak a, officer leh advisor atan pawh tourism lama tawn hriat ngah tak tak ruat an nih avangin tourism chuan nasa takin hma a sawn zel dawn a ni tiin a sawi.