Assam : Tea garden huamchhungah model school 80 sak belh dawn

Assam sorkar chuan tea garden huamchhungah model school 80 a sakbelh dawn tih chief minister Himanta Biswa Sarma chuan Ningani khan a sawi. CM hian Tea Garden Model School leh Adarsha Vidyalayas headmaster-te nen inbiakna an neihnaah he thu hi a sawi a ni.

CM Sarma chuan a kaihhruai sorkarin state chhunga tea estate 800-ah model school 200 din a tum tih a sawi. November 2022 khan sikul 118 sakna tur lungphum an lo phum tawh a, sak mek an ni. Sikul awm sate hlawhtlinna avangin Chief Minister chuan sikul dang 80 din belh a ni dawn tih a sawi. Tea garden huamchhunga chengte khawsak tih hmasawnna atan zirlai naupang sikula inziah luh tam a pawimawh thu a sawi bawk.

Chief Minister chuan infrastructure tih changtlung leh zirtirtu service tih hmasawn kawnga sorkar inpeknate sawilangin, zirlai pawl kua leh pawl 10 te tan mid-day meal scheme kalpui an tum tih a tarlang. Hei bakah sorkar chuan model school-ahte hian smart board leh smart classroom facility dah tum a nih thu a sawi bawk. Adarsha Vidyalayas 57 te pawh zirna ṭha zawk leh hmun hla leh tlawhpawh loha awmte thiam thil tih punna atan a ṭangkai tih sawiin, heng sikul ti changtlung tur hian sorkarin hma a la mek a ni, a ti.

Assam sorkar chuan hmun hla zawk leh tlawhpawh harsaa awmte tan pawl ruk chin chunglamah sikul an kalna tur bicycle a pe dawn bawk a, School Breakfast Program leh health checkup neih fo a ni bawk ang.