Assam: Tuilian vangin mi pahnih thi

Assam-a Golaghat district-ah tunkar chhungin tuilian vangin mi pahnih an thi. Pakhat zawk hi Nilainia tui tla niin, pakhat zawk hi nimina thi a ni.

Golaghat district hi tuilianin chhiatna a thlen nasatna hmun niin, Dhansiri lui chuan hlauhawm chhinchhiahna a pel tawh a, Numaligarh leh Golaghat khuate pawh an dinhmun a ṭha lo hle.

Assam-ah hian ruahtui a tlak tam avangin revenue paruk huamchhung, Morongi, Bokakhat, Golaghat, Khumtai, Sarupathar leh Dergaon te chuan harsatna nasa tak an tawk tawh a, khaw 92-ah chhiatna thleng tawhin mi 23,000 chuangin tuilian vang hian buaina an tawk mek a, an zingah hian naupang 4,300 an tel.

Agriculture minister leh Bokakhat MLA Atul Bora chuan Nilaini khan tuilian tuar nasa zualte chu an dinhmun hrechiang turin a tlawh. Bokakhat constituency huamchhunga Kuruwabahi leh Chinakana te pawh tlawh telin, tualchhung mipuite nen inbiakna hun an nei a, harsatna tawk chhungkuate chhawmdawl an ni dawn tih a hrilh. Numaligarh Higher Secondary School, Pub Kuruwabahi ME School leh Chinakana relief camp-a awmte pawh ṭanpuina leh chhawmdawlna pe turin official-te a hriattir. Bora chuan hi district official, panchayat aiawh, tualchhung BJP leh AGP worker-ten an ṭawiawm.

Assam State Disaster Management Authority (ASDMA) tarlan danin, tuilian hian state hmun hrang hrangah harsatna a thlen a, district parukah mi 32,300 chuangin buaina an tawk mek a, Golaghat bikah hian chenna in chhuahsan an tam ber tih an tarlang.

Nilaini khan Morongi huamchhunga khaw 25 te chuan tuilian hi tuarin chhungkaw 6,000 chenna leh leilette chu tuiin a chim a ni. Ranvulh leh sangha khawite pawhin nasa takin an tuar bawk. District hotute chuan harsatna tawkte tan relief camp 55 an hawng tawh a, nitin mamawh semchhuahna hmun 34 an siam tawh a ni.