Meghalaya : Dy CM-in Lapangap ramri tlawh

Meghalaya deputy chief minister Sniawbhalang Dhar chuan Thawhlehni khan Lapangap ramria khuate tlawhin, tun hnaia Assam thuneituten Lapangap khua, Jaintia Hills-a tree plantation drive an neih avanga buaina chhuak chungchang chu state sorkarin a chhui zui dawn tih a sawi.

Dhar hi Nartiang constituency bialtu niin, Lapangap dinhmun hrechiang tur leh khaw mite himna enthlithlai turin a kal a ni. Jaintia Hills Autonomous District Council chief executive member Thombor Shiwat, deputy commissioner Abhinav Kumar Singh leh SP Jagpal Singh Dhanao ten an ṭawiawm.

June 25 khan Lapangap leh a chhehvela cheng mi 400 chuang leh NGO te chuan lungawi lohna lantirin, Meghalaya huamchhungah Karbi Anglong Autonomous Council (KAAC) ten thingṭiak an phun chu duh loin an lo phawisak tawh a ni.

Meghalaya huam chhunga Assam-in thing phun beihpui an kalpui avanga buaina chhuak chuan ziaawm lam pan tawh mah se, khaw mite chuan buh an chinna hmunah hna an la thawk chhunzawm thei lo tih an sawi. Dhar chuan tuma tih buai loha zalen taka an chet tlat leh theihna turin inbiakna mumal neih a ni dawn tih hrilhin, state pahnih commissioner-te chu he buaina chingfel turin an inhmu thuai dawn a ni, a ti.

Lapangap-ah hian venhimna kengkawh turin police 40 dah an ni tawh a, state pahnih regional committee-te pawh Assam inthlan zawhah meeting an nei dawn tih a sawi. Assam leh Meghalaya hian ramria buaina an la neihna hmun paruk-a buaia chinfelna turin inremna, memorandum of understanding (MoU) an lo ziak tawh a, MoU dang pawh August 15 hmaa ziah leh tura beisei a ni.