Tripura: Tuilian vangin chhungkua 100 chuangin chenna in chhuahsan

South Tripura-a Belonia leh Santirbazar subdivision-ah Thawhṭanni zan thlenga ruah nasa taka sur chuan tuilian thlenin, chhungkua 100 chuang chenna in a ti chhia a, mi 289 te chu relief camp-ah dah an ni.

Ruah sur nasa vangin Muhuri lui chuan hlauhawm chhinchhiahna a pel tawh tih South Tripura district magistrate Muhammad Sajad chuan a sawi. He lui chhehvela chengte chu tuilian thleng palh thei laka in inring renga awm turin a chah. Chhanchhuah leh puih an ngaih huna ṭanpuina an dawn vat theihna turin disaster management team-te leh civil official-te chuan an dinhmun an enthlithlai reng tih a sawi bawk. Sikul leh Anganwadi centre te pawh nimin khan khar an ni.

Chief minister Manik Saha chuan South Tripura district-a tuilian tuarte chhawmdawl leh ṭanpui hna thawk turin mi tin a ngen tih Sajad chuan a sawi. India Meteorological Department (IMD) chuan South Tripura-ah hian ruah nasa takin a la sur chhunzawm dawn nia sawiin, 'orange alert' a ti chhuak a, Gomati leh Sepahijala district-ah pawh Nilaini khan 'yellow alert' an ti chhuak bawk.