Assam : PMAY-G hnuaiah in nuai 21 chuang sa zo tawh

Assam Panchayat and Rural Development minister Ranjeet Kumar Dass chuan Pradhan Mantri Awas Yojana - Gramin (PMAY-G) hnuaiah state chhungah in nuai 21 chuang sak zawh a ni tawh a, nuai 7 aia tam sak mek an la ni bawk tih a sawi.

Thingtlanga chengte khawsak chawikanna turin sorkar chuan hma a la zel a ni tiin, Dass chuan in sak mekte hi sak zawh a nih hunah kachcha ina cheng chhungkua eng zat nge la awm tih hre turin survey neih a ni dawn tih a sawi a, list thar chu Gram Sabha pawmpui tura thehluh a ni dawn a ni, a ti.

Minister chuan state sorkarin dinhmun hniam zawkte chawikanna tur facility eng emaw zat a siam thu sawiin, chung zingah chuan chenna in, tui thianghlim, electric leh banking service te pawh an tel tih a sawi. Hmeichhe dinhmun tih chakna leh chawikanna atan prime minister Narendra Modi hmathlir kalpui a ni tih a sawi bawk a, hmeichhia zawng zawngte mahnia intungding thei turin Lakhpati Didi scheme pawh an kalpui mek bawk a a, hmeichhia nuai 8 an awm tih a tarlang.

State chhunga Self-help-group (SHG) a member nuai 40 zingah hmeichhia nuai 30 te chu sorkar ṭanpuina dawng tura thlan fel an ni tawh a, heng mite hian a thawh khatnaah Rs 10,000 an dawng dawn a, a thawh hnihnaah Rs 25,000 an dawn leh dawn bakah, bank lamin 50% an thawh dawn bawk tih Minister chuan a sawi.