Meghalaya : Sohra International Half Marathon neih a ni dawn

Meghalaya Athletics Association, Meghalaya State Olympic Association (MSOA) leh Directorate of Sports and Youth Affairs te buatsaihin September 27 hian Sohra (Cherrapunji) ah Sohra International Half Marathon vawi lina neih a ni leh dawn.

Sohra International Half Marathon hi World Athletics leh Athletics Federation of India (AFI) ten an pawmpui a ni. Half Marathon vawi lina buatsaihna tur hian budget Rs vbc 2.97 siam a ni.

Thawhṭannia press briefing an neihnaah, Sports & Youth Affairs director D.D. Shira , MSOA working president John F. Kharshiing leh MSOA general secretary Finely Pariat te chuan Meghalaya leh hmun danga infiammi te chu he marathon-a tel tur hian an sawm. Shira chuan department hrang hrang aṭangin thlawpna an dawn ṭhat thu sawiin, hlawhtling taka neih leh theih ngei an tum tih a sawi. Karshiing chuan he hun hi hriselna lam chawikanna mai ni loin Meghalaya chu khualzin tlawh tamna hmun a ni tih pholanna hun remchang a ni, tiin a sawi.

Nikuma half marathon buatsaihah khan mi 7,000 vel an tel tih Pariat chuan sawiin, kumin hian mi 10,000 chuang an tel a beisei tih a tarlang. Lawmman an sem chhuah tur hi Rs nuai 15.50 vel an tlin tur thu a sawi bawk.