Arunachal Pradesh: Education Minister-in Saksham Centre hawng

Arunachal Pradesh education minister P.D. Sona chuan Springdale 5th IR Bn Welfare School, Pasighat-ah Thawhṭanni khan zirlai naupangte zirna lama hmasawnna leh chakna an neih theihna tura duan, 'Saksham' centre a hawng.

Saksham Centre hi National Education Policy of India 2020 leh National Curriculum Framework 2023 hmathlirah pawh telh a ni. Zirlaiten thil tam zawk hriat chakna, thiamna leh inrintawkna an neih theihna tur kawnga pui thei tura tih a ni.

Hawnna inkhawmah Sona chuan 5th IRBn commandant Garima Singh, IPS leh a team IRBn-a sipaiten ṭhalai la naupang zawkte tan hetiang zirna hmun ṭha din tura an hmalakna chu a fak a, zirna sector-in nasa takin a ṭangkaipui dawn a ni, a ti. He hunah hian Pasighat East MLA Tapi Darang, DC Sonalika Jiwani, SP Pankaj Lamba, leh DDSE Odhuk Tabing te pawh an tel.

Minister chuan zirlaite zingah thiamna ril zawk nei tura inchherna hun leh, lehkha zir nuam an tih theihna tura sikulah zirlaite hun pek a ṭul thu a sawi. He centre hi 5th IRBn-a naupangte tan chauh ni lo, Pasighat leh sikul dang aṭang pawh an hman theih tura hawn a ni chu lawmawm a tih thu a sawi bawk.

Education Minister chuan state sorkarin pre-primary sorkar sikulte chu Anganwadi centre-te nen thlunzawmin elementary level-ah integrated learning method a kalpui dawn tih puangin, zirlai naupangten space technology-a an tui theihna turin sikulah space lab dah a ṭul tih a sawi bawk a ni.