Nagaland : Tuilian vangin mi 3 an thi

Nagaland-a ruahsur nasa avangin hmun hrang hrangah tui a lian a, tuilian chhiatna a thlenah mi pathum an thi tawh. Dimapur Airport-a thlawhtheihna service pawh Thawhṭanni khan runway te tuiin a chim avangin tih tawp lailawk a ngaih phah bawk.

Ruahsur nasa avang hian National Highway 29-ah hmun eng emaw zatah lei a min a, Dimapur leh Kohima inkalpawhna lam pawh a nghawng a ni.

Tuilian avanga thi, mi pathumte hi Dimapur-a mi niin, an chenna in tuiin a chim hnuah electric current kalsual avangin an thi a ni. Dimapur khawpui hi tuiin a chim nasa hle a hmun ṭhenkhatah chuan tui tling hi feet thum te a tling a ni. Half-Nagarjan a chengte pawn lama an chhuah dawn pawhin lawng an hman a ngai. Harsatna tawk mi 52 chhanchhuah an ni tawh bawk.

Dimapur, Kohima leh Niuland te chu a tuar nasa zual an ni a, tuilian hian chenna leh lei te a chim bakah, buh chinna hmun leh sangha khawina hmun a tih chhiat nasat avangin harsatna an tawk nasa hle a ni. Niuland district-a khaw 70 velin he tuilian vang hian harsatna an tawk mek a ni.

Assam : Lui lian 3-ten hlauhawm chhinchhiahna pel

Assam-ah ruah a sur nasat avangin state chhunga lui lian pathumte chuan hlauhawm chhinchhiahna an pel tawh a, hei bakah lui dang pasarihte chuan warning level an pel tawh bawk niin Central Water Commission (CWC) chuan a tarlang.

CWC in lui pathum - Golaghat leh Numaligarh-a Dhanisri lui bakah Sivasagar district-a Dikhow lui kama chengte chu tuilian tuar mai thei dinhmunah an ding mek niin a sawi. Ruah a la sur chhunzawm dawn vangin tuilian hi a la zual zel thei tih a sawi a ni.

India Meteorological Department pawhin Assam, Meghalaya leh Manipur-ah ruah a sur nasa dawn nia sawiin red leh orange alert a lo ti chhuak tawh bawk.