Meghalaya : Kynshi Hydro Project chhunzawm dawn

Meghalaya sorkar chuan Kynshi Hydro Power Project Stage-I thawhna tura M/s Athena Private Limited nen Memorandum of Understanding (MoU) an lo ziah tawh chu tuai thar leh a tum. Hemi atana rawtna hi kar leh Thawhṭanniah cabinet hmaah thlen a nih tur thu power minister AT Mondal chuan a sawi.

He project hi Run-of-the-River (RoR) basis-a Athena Pvt Ltd thawh tura tih a ni. Mahse company hian a hnuah Pump Storage Project (PSP) technology hman a rawt a, PSP hi an MoU ziahah a tel loh avangin cabinet chuan inremna an siam tawh chu an sut leh ta a ni.

Mondal chuan thuthar lakhawmtute a kawmnaah, technology thar awm mah se RoR hman theih a nih tho thu a sawi a, rawtna an siam a anga kalpui leh mai an duh thu leh, MoU tuai thar lehna atan cabinet an thlen a ngaih thu a hrilh bawk. State sorkar chuan he project hi thawh a nih chuan a thlawnin power 12% a dawng dawn a, tualchhung tih hmasawnna turin 1% dah a ni ang.

Minister hian Kynshi Hydro Power Project (JCLPKHPP) Joint Committee aiawhte hmuin, an inbiakna pawh a ṭha lam a nih thu a sawi. Thawh hona ṭha a awm theihna turin sorkar, company leh tualchhung stakeholder-te nen meeting neih a ni dawn tih a sawi bawk.