Arunachal Pradesh : Silai 2400 chuang an tung tawh

Arunachal Pradesh-a 'Air gun Surrender Abhiyan' kalpuina hnuaiah nimin, July 4 thleng khan silai 2400 chuan tun a ni tawh tih official-ten an puang. Hei hi sava leh ramsa pel ṭhin tih tawpna tura hmalakna niin, prime minister Narendra Modi leh UNESCO pawhin an fak hle.

Chief minister Pema Khandu chuan he hmalakna hi Arunchal Pradesh tan tih chhuanawm tak a ni tiin, chenna leilung leh a chhehvel venghim tura mipuite inpekna chu lawmawm a tih thu a sawi. Social media-ah pawh thuchhuah siamin, "Mipuiten kan chenna leilung a chhehvel ngaihhlutna chang hriaa, a venhim kawnga mawhphurna rilru an putna chiang taka ti langtu a ni," tiin CM chuan a tarlang.

He campaign hi March 2021 khan East Kameng district-a Lumding khuaah hawn a ni a, hawnna inkhawmah hian air gun 46 an lo tung tawh a ni. He hmalakna hian rah ṭha a chhuah chhunzawm zel a, Environment and Forest Department thlawpna leh minister hlui Mama Natung kaihhruainain state hmun hrang hrangah kalpui mek zel a ni. Mi sang chuangin air gun, silai license nei leh power chainsaw khawl, thing kihna atana an hman ṭhin te pawh an hmang tawh lo a ni. An hmalakna avang hian sava hmuh tur tam tak an awm leh tawh bakah, district hrang hrangah nungcha leh ramsate pawh an pung leh tawh tih official-te chuan an sawi bawk.

Sava veh leh ramsa pel ṭhin tih tawp a nih theihna atan inzirtirna kalpuiin camp leh rally te buatsaih ṭhin a nih bakah, district level outreach programme te pawh an nei fo bawk. Heng hunah hian khawtlang hotute, NGO, zirlai pawl leh forest official-te an thawk ho ṭhin a ni.