Assam : Japanese Encephalitis vangin mi 10 thi tawh

Assam Health Department chuan thuchhuah siamin, state hmun hrang hrangah Japanese encephalitis vei an pung a, tun dinhmunah chuan hlauhthawnawm tak la ni lo mah se he natna hi a darh tawh hle tih a sawi. National Health Mission executive director Dr Manoj Choudhury chuan he natna vang hian kuminah mi 10 an thih tawh thu leh, mi 134 in an vei mek thu a sawi bawk a; Nalbari, Barpeta, Jorhat leh Darrang te chu a tuar nasa zual an ni.

Dr Choudhury chuan he natna hi thosi seh aṭanga kai theih a ni tih sawiin, thosi ten bawng emaw vawk emaw an seh hnua mihring an seh lehin he natna hi a kai theih tih a sawi. Chenna in hnaiha bawng leh vawk vulh nasat avangin he natna hi a pung duh bik tih a tarlang bawk. He natna hi May thla aṭanga August thla chhungin a hluar hle a, fur ruahtui tlak tam zawhah a reh ve leh mai ṭhin tia sawiin, khawsik sang tak neite chu doctor rawn thuai turin a hriattir. Health worker-ten mihring chenna inte tlawhin, thosilen zar a pawimawh zia an hrilh kual tih a sawi bawk.

Japanese Encephalitis veite hi a nasat tawh chuan thluak a khawih a, nikhaw hre loin an awm phah thei. Mahse a tam zawk chu mahnia inenkawl dam theih a ni thung.

Dr Choudhury chuan JE natna chu upper Assam-ah vei an pun hnuin Health Department hmalakna avangin ziaawm a pan leh tawh a, mahse lower Assam-ah a rawn pung ṭha leh chu ngaihtuah tham a nih thu a tarlang bawk a ni.