Manipur healthcare system a tlachhia

Manipur-in kum hnih chhung tualchhung buaina a tawh hnuah, state healthcare infrastructure chuan nasa takin chhiat lam a pan zel. Hei vanga hriselna lama mithiam, ukil leh activist te chuan president Droupadi Murmu hnenah a rang lama hma lak sak tura ngenna lehkha an thawn.

President hnenah hian National Health Rights Alliance, All India Feminist Alliance leh National Alliance for Justice, Accountability and Rights te nen ṭangkawpin ngenna hi thehluh a ni. Vantlang hriselna a tlakchhiat thu leh mi sang chuang enkawlna mumal nei loa an awm thu te, mi nuai chuangin health service mumal an nei lo tih an sawi.

Manipur-a buaina chhuak reng chuan mipui hriselna dinhmun thlengin a nghawng a, damdawi-in tam tak tih chhiat a nih bakah, health worker eng emaw zat an tlanchhia a, medical supply an tlachham bawk a ni. Mi 70,000 chuang chu relief camp tawt takah an awm khawm a, mihring hriselna atan a him loh bakah medical facility indaih lohna a sang hle a ni.

Thingtlang lam a nghawng na zual a, health centre tam tak chu buaina chhuak vang hian hman zawm lohin an awm mek a, thawktu an indaih lo hle bawk. Taksa lam bakah rilru lam thlengin an tuar a, a bikin naupangten hlauhthawnna leh rilru lamah harsatna hrang hrang an tuar mek a ni. Zirna kalpui mumal theih a nih loh avangin zirlaite hmalam hun nasa takin a ti chhe bawk tih te an lekhaah hian an tarlang. Medical staff lak thar thuai te, tualchhung buaina chhuahna bialahte community health centre hawn leh thuai leh, sorkar laipui aṭanga puihna tam zawk pe turtein an ngen bawk.