Manipur: Hmun hming phuah leh thlak chungchangah dan khauh zawk hmang

Manipur sorkar chuan state chhunga hmun hming phuah leh thlak chungchangah dan khauh zawk a siam, The Manipur Names of Places Act, 2024 chu a takin a kalpui tan ta. He dan hi March 15, 2024 khan Extraordinary Gazette-ah puanzar niin, hemi hnu aṭang hian hman ṭan nghal a ni.

"The Manipur Names of Places Bill, 2024" hi Manipur Legislative Assembly vawi 12-na, session ngana, March 2024-a neiha bill pawimawh tak tak paruk House-in a pawm zinga mi a ni. He dan kalpui dan enzui tur hian, sorkar chuan kum 2024 December thla khan Places Names Committee a lo din tawh bawk. Committe hian hming thlak tura rawtna awmte a enfiah ṭhin dawn a, sorkarah a lo ngaihtuah zui turin a report a thehlut bawk ang.

Nilainia sorkar thuchhuah chuan Manipur-a hmun hming phuah leh thlak a nih dawnin Land Resources Department phalna lak hmasak zel a ngai dawn a ni. He thu zawm lo te chu section 13 hnuaiah kum thum chhung lungin tan emaw, Rs 50,000 leh Rs nuai 2 emaw thlenga chawitir theih an ni. Deputy Commissioner zawng zawng leh administrative department-te chu he dan hi kenkawh ṭhat a nih leh nih loh chungchangah mawhphurhna lian tak pek an ni bawk.