Assam : Private Hospital-ah bill pek loh vanga ruang hren khap

Assam chief minister Himanta Biswa Sarma chuan Nilaini khan private nursing home-a bill pek tlak theih loh avanga mitthi ruang an hren ṭhin chu tih tawp vek a nih tur thu a puang.

Chief Minister Sarma chuan damdawi-in bill pek tlak theih loh vanga ruang hren theihna dan a awm loh thu sawiin, private hospital tam takin bill pek zawh a nih hma chu mitthi ruang an hren ṭhin thu leh, damdawi-in ṭhenkhatin damlo pawh bill an pek fel hma chhuah tir an phal loh ṭhin thu a sawi bawk.

Sarma chuan hetiang zawnga harsatna tawkten thuneitu lam an biak pawhna theihna tur helpline number siam turin health minsiter Ashok Singhal pawh a hriattir bawk. Hemi hmang hian police inrawlhin, a hun takah mitthi ruangte chu an chhungte pek chhuah a ni thei dawn a ni, a ti.

Damlo, damdawi-in bill pe tla thei lo an awm chuan damdawi-in lam chu sawifel pui turin CM chuan a ti a, mitthi ruang hren ṭhin chu thil dik lo leh dan kalh a nih thu a sawi. "Police-te pawhin mi an manin court an hriattir ṭhin a, damdawi-in erawh police leh judiciary lam engmah hriattir loin an ngawihpui ṭhin a ni," tiin GMCH auditorium, Bhangagarh-a hun neihah a sawi.

Hemi chungchang hi cabinet meeting lo awm turah sawi ho a nih dawn bakah, thutlukna pawh siam a ni dawn tih Chief Minister chuan tarlangin, private hospital-te chu damlo tlin phak ang tawka enkawlna pe ṭhin turin a ti. Hemi ni vek hian CM Sarma chuan medical leh health officer lak thar 400 hnenah appointment letter a hlan a, doctor tam zawkin public sector an thlan avangin lawmawm a tih thu a sawi bawk. Kum 2029-ah Assam chuan medical college 30 a nei tawh dawn tih a puang nghal bawk a ni. Tun dinhmunah medical college hi 13 a awm mek a ni.