Manipur : Governor-in Covid-19 laka invenna tur ennawn

Manipur governor Ajay Kumar Balla chuan Thawhṭanni khan state chhunga Covid-19 hri darh zel tur venna atana an hmalaknate a ennawn. June 1 khan Manipur-ah hian Covid-19 vei pakhat hmuh chhuah a ni a, Thawhṭanni thleng khan he natna hmuh chhuah thar hi mi 20 an tling tawh.

Hri kai mek mi 19-te chu an chenna inah inkhung hran tir an ni a, pakhat chu enkawl dam a ni tawh a ni.

Covid-19 hri darh ṭhat leh avang hian governor Ajay Kumar Bhalla chuan high-level review meeting chu senior official-te leh damdawi lam thiamte nen neiin, hri leng dona kawnga hma lak dan tur an sawi ho a ni. Union ministry of health and family welfare (MoHFW) in hri darh zel tur lak venna atana kaihhruaina a siamte chu zir ho a ni bawk a ni.

Raj Bhavan-a review meeting neihah hian state health department official-te chuan state chhunga inralrinna kalpui dante an sawi lang. Damlo enkawlna hmanraw ṭha zawk, oxygen supply, ICU leh isolation ward siam, damdawi mamawh leh IDSP-IHIP portal siam a nih thute an sawi. Hei bakah sample test chungchanga harsatna an tawh ṭhin te pawh sawi ho a ni bawk tih Raj Bhavan chuan a tarlang. Govenor chuan department hrang hrangte chu inbuatsaih ṭha a, hri darh leh thei laka a ṭul anga hma la thei tura inpeih turin a chah.