Arunachal Pradesh : AAPSU-in rally buatsaih

All Arunachal Pradesh Students' Union (AAPSU) chuan Thawhṭanni khan dan loa state chhunga pem lut duh lohna leh, state leilung fate dikna chanvo humhalh phutna lantirin, state khawpui Itanagar-ah Mega Mass Referendum Rally an buatsaih.

Rally hi zing dar 10-ah neih ṭan niin, zirlai bakah community-based organisations (CBO) leh NGO te an tel. An rally thupui atan "Say No to Demographic Invasion," "Protect Our Land, Identity & Future," and "Save Arunachal from Illegal Immigrants," tihte hman a ni.

AAPSU chuan thil phut pawimawh tak tak pali neiin chungte chu State Electoral Roll endik leh siamṭhat, Arunachal khua leh tui ni lo, non-APST electoral roll aṭanga paihthlakna tur cabinet-in a pawmpui, state chhunga dan loa pem lutte thawn haw leh, Arunachal Pradesh khua leh tui dik takte dikna chanvo humhim tura hmalak te an ni.

Zirlai pawl president Tana Doji Tara chuan thuthar lakhawmtute a kawmnaah, an hmalakna chu lungawi lohna lantirna mai ni loin, state chhunga leilung fate venhimna a nih thu a sawi. An hmalakna chu engmahin a dang dawn lo tih a sawi bakah, dan loa state chhunga pemlut,Chakma leh Hajong te pawh telin state aṭanga thawn chhuah leh electoral roll aṭanga an hming paih a nih theihna turin hma an lak zel tur thu a sawi.

AAPSU general secretary Ritum Tali pawhin an pawl chuan Governor, Chief Secretary leh Chief Minister-te hnenah an thupui "No Amnesty, Just Deportation" tih hmangin memorandum an thehluh tur thu a sawi bawk.