Meghalaya Health summit hmasa ber nei

Meghalaya-a healthcare ecosystem tih chakna atana hma an lakna kalzelah, a vawi khatna atan Meghalaya health summit neih a ni.

Summit-ah hian health sector-a stakeholder hrang hrangte an tel a, hriselna lama harsatna tawhte sut kiang dan tur, thingtlang khuaa technology tih changtlung, service delivery tih hmasawn dan turte an sawi ho.

Chief minister Conrad K. Sangma chuan summit hi hmanpuiin, healthcare thlak danglamna tura state sorkar inpeknate a sawi a, a vawikhatna atana Health Summit neih a ni chu Meghalaya mipui hriselna kawnga hma lam panna atan mellung pawimawh tak a nih thu a sawi. Cancer leh diabetes chungchanga harsatna an tawh ṭhin pawh sawilangin, hetiang natna do tur hian research nasa lehzuala neih a pawimawh thu a sawi bawk.

Chief Minister chuan kum sarih kalta aṭanga state sorkarin healthcare hmasawnna atana an inpekna a sawilang bawk a, mithiam tak tak chhawr leh health infrastructure tih changtlung bakah, healthcare system ṭha zawk hmang turin tunlai thiamna changkang tak tak hman a ṭul thu a sawi.

Summit-ah hian Auxiliary Nurse Midwife (ANM) leh General Nursing and Midwifery (GNM), Meghalaya hmun hrang hranga thawk tura lak tharte appointment letter pek an ni nghal bawk. CM Sangma chuan tuina tak tak, midangte hriatthiamna leh dikna nen he hna hi thawk turin a fuih bawk.