Manipur: Air India-in Imphal Airport-a service titawp

Air India chuan Imphal International Airport-a kum 10 chhung an service chu June 15 aṭang khan an ti tawp ta. Air India neitu, Tata Group-in hun rei tak zawk daih tur ruahmanna a siamna hnuaiah Imphal route hi man tlawm zawka kalpui thei tur, Air India Express kutah a awm tawh dawn a ni.

Hemi chungchangah hian Imphal Airport chuan an social media-ah thuchhuah siamin, "Kum sawm chhung service rintlak tak a kalpui hnuah, Air India chuan Imphal International Airport-a an hnathawh chu a ti tawp ta. Manipur aviation chanchina bung pawimawh tak chu vawiin June 15 hian khar a ni ta" tiin an tarlang. Airport chuan Air India Express-in an hna chu a chhunzawm tur thu sawiin, inkalpawhna pawh ṭha takin a awm chhunzawm thei zel dawn a ni, a ti.

Airport chuan hetianga an thlak danglam hi tun hnaia thil thleng nen inzawmna a nei lo tih sawiin, a hma aṭanga insiamṭhatna tura an ruahmanna lo siam tawh zinga mi a nih thu a sawi.