Sikkim : Greenfield Highway project pawm

Ministry of Road Transport and Highways chuan Greenfield Highway project, Sikkim chu a pawm. He highway hi Melli leh Singtam inkara siam tur niin, NH 10-a kawng tawt lutuk a ti ziaawm thei dawn a ni.

Union minister Nitin Gadkari chuan Sikkim chief minister Prem Singh Tamang nen Ningania inbiakna an neihah project pawm a nih thu hi a hrilh. Gadkari chuan he highway thar hi Sikkim tan a pawimawh dawn hle tih sawiin Singtam leh Melli inthlunzawmna tur kawngpui siam chu Sikkim-in an state kum 50-na an lawm denchhena thilpek a nih thu a sawi bawk.

Tuna an kawng hman laiah chuan Gangtok NH 10 pan tur hian Melli, West Bengal an kaltlang phawt a ngai a ni. Kawngpui thar siam hi traffic tawt tih ziaawmna tur leh state chhunga inkalpawhna tih hmasawnna tur a ni. Highway tharah hian Melli leh Singtam-a kal tur tan Sikkim aṭangin an kal thei tawh dawn a, West Bengal an kaltlang a ngai tawh dawn lo a ni.

Kawngpui thar hi hman a nih hunah chuan state chhung tan inkalpawhna ṭha siam bakah, tourism lam pawhin chhawr ṭangkaiin khualzin lut pawh an tam phah beisei a ni. Nitin mamawh lak luh kawngah pawh Rangpo-a traffic tawh tak tak paltlang ngai loin an kal thei tawh dawn bawk a ni.