Nagaland : Cabinet-in ILP chungchang ngaihtuah

Nagaland Cabinet chuan Ningani khan Chief Minister Residential Complex, Kohima ah meeting an nei. Meeting-ah hian thil hrang hrang ngaihtuahin, heng zingah hian Inner Line Permit (ILP) system hman mek thuam chak dan chungchang pawh a tel.

Meeting neih zawha Hotel Japfü-a thuthar lakhawmtute an kawmnaah, sorkar thupuangtu Imna Along leh CL John te chuan an thurel leh thutluknate an sawi.

Hmun hrang hranga ILP hman dan chungchang, a bik takin Dimapur-a an kalpui dan chu home department-in Cabinet hnenah sawiin, sawihona neih hnuah ILP system thuam chak an rel tih an sawi. State leh central sorkar hnuaia thawk chhungte leh fate chuan sorkar hriatpuina identity card an neih chuan ILP hi an neih kher a ngai dawn lo a ni. Private leh public company hotute chu an hnuaia hnathawk, ILP dil ngaite tana guarantor-a ṭang tura tih an ni bawk.

Cabinet chuan online-a ILP dilna portal chu huam zau zawka siam turin a ti bawk a; driver, ukil, architect, skilled professional, chhungkaw nu, hnathawh nei lo, naupang sikul la kal lo, mi in luah, social worker, private sector-a hnathawk, consultant leh a dangte huam tel tir vek turin a ti.