Arunachal Pradesh: SDSU-in Boleng District Hospital hman thuai an phut

Arunachal Pradesh-a Siang District Students' Union (SDSU) chuan Boleng-a District Hospital sak thar, hun rei tak chhung hman theih loha awm tawh chu hman thuai an phut. He damdawi-in hi December 19, 2024 khan hawn a ni tawh a, mahse mipui vantlang tan hman theih a la nih loh bakah, medical service kalpui a la ni lo.

SDSU vice president leh medical and health sector chairman, Karban Tamut chuan state sorkarin he damdawi in hman ṭan a nih theihna tura hma an lak loh avangin a lungawi loh thu a sawi. Siang district-a chengte chuan beiseina sang tak nen he damdawi-in thar hi an lo nghah tawh laiin, hetianga namnul leh a ni chu a hriatthiam loh thu a sawi a ni.

Tamut chuan tualchhung mite harsatna tawh sawilangin, damlo inenkawlna atan Aalo emaw Pasighat emaw, km 90-a thui an pan a ngaih thu a sawi. Siang district-ah chuan healthcare infrastructure mamawh zual pawh a awm lo a, damdawi zawrhna hmun a awm loh bakah, emergency medical supply a awm loh thu a sawi bawk a ni.

District healthcare system chuan Indian Public Health Standards (IPHS) a bawhchhiat thu Tamut chuan sawiin, Siang mipuite chu damloh nikhuaa mithiam enkawltu an neih loh avangin an dinhmun a ṭhat loh thu a sawi.

SDSU chuan Boleng hospital-ah hian medical specialist-te dah thar thuai turin an phut a; Union chuan Community Health Centre, Rumgong-ah pawh medical officer dan an ngen bawk.