Assam: CM-in welfare scheme ennawn

Assam chief minister Himanta Biswa Sarma chuan state chhunga inrelbawlna leh hmasawnna lama harsatna awmte enfiahin heng zingah hian police welfare, social welfare scheme, capital investment project-te leh thlai thar chhuah thawnchhuah chungchangte a tel.

CM Sarma chuan a social media X-ah thuchhuah siamin, sorkarin Assured Career Progression (ACP) Scheme hnuaiah Assam Police-te a hun taka an kaisan theihna tur leh, rim taka an hnathawh te hriatpuina turin constable aṭanga havildar thleng an kaisan theihna tura ruahmanna siam a nih thu a tarlang.

Orundoi 3.0 scheme hman dan tur ennawnna meeting pawh CM Sarma hian kaihruaiin, district tina hamṭhatna dawngtu turte hmaih bik an awm loh tur thu a sawi a; sum leh pai lama harsa zual, a bikin hmeichhiate ngaihtuah an nih tur thu a sawi bawk.

Hei bakah hian Chief Minister chuan, Special Assistance to States for Capital Investment programme hnuaia project hrang hrang thawh mekte thlirletna hun a nei bawk. Assam Agribusiness and Rural Transformation Project (APART) in tualchhung thlai tharte ramdanga thawnchhuah hna hlawhtling taka an kalpui avangin a fak bawk. APART hi One District One Product (ODOP) hmalakna nena inzawm niin, loneitute thlai thar tih pun leh sum tam zawk lakluh kawngah nasa takin a pui a ni. A thawh hnihna APART 2 chu tlangzarh a ni bawk.

APART Assam hian state chhunga thlai thar chhuahte khawvel ram hrang hranga thawnchhuah kawngah hlawhtlinna neih belh zelin, APART 2 pawh hi ODOP nen ṭangkawpin loneitute nasa takin a pui dawn a ni. Meeting-ah hian CM Sarma chuan public service tih chak leh, Assam state pumpuia hmasawnna leh ṭhanlenna a awm theihna turin hmalak a nih thu a sawi.