Tripura Chief Minister - Manik Sarkar

Tripura Chief Minister ni lai Manik Sarkar hi January 22, 1949 khan Radhakishorepur, Tripura-ah a piang a, an state chief minister ni thei pakuana a ni.

Manik Sarkar te chhungkua hi middle-class niin, a pa Amulya Sarkar chu puanṭhui a ni a, a nu Anjali Sarkar chu sorkar hnathawk a ni thung. Sarkar hi school a kal lai aṭangin zirlai pawl hrang hrangah a inhmang chho
ṭan a, kum 1968 khan kum 19 mi lek niin Marxist Communist Party a zawm. An state-a Maharaja Bir Bikram (MBB) College aṭangin B. Com a zo a, zirlai hruaitu hlun berte zinga mi a ni. MBB College Student Union-ah General Secretary niin, Students' Federation of India-ah te pawh Vice President a lo ni tawh ṭhin. Kum 1972 khan party luhchilh
ṭanin, Communist (Marxist) Party, State Committee member atan ruat zui a ni.

Political career

March 1998 khan Communist Party of India (Marxist)-ah Politburo Member atan ruat a ni. CPI (M) State Committee member-ah a zawnin kum ruk a awm a, kum 1978-a an party-in an state-ah thuneihna a chan khan mi hriat a hlawh ṭan a ni. Kum 1980 khan kum 31 mi lek niin, Legislative Assembly Election-ah a vawi khatna atan dingin, Agartala constituency aṭangin thlan tlin a ni. Hemi hnu hian an party chuan Chief Whip atan a ruat zui bawk.

Kum 1993-a Left Front-in sorkarna an chan khan Sarkar hi CPI (M) State Secretary atan ruat a ni. Kum 49 a nih kum, 1998 khan Tripura Chief Minister atan lakluh a ni a, a zawnin chief minister atan ṭum li thlan tlin a ni tawh. Kum 2013 state assembly election-ah khan hnehna chang lehin chief minister atan lakluh a ni a, tun thlengin he hna hi a la chelh a ni. Manik Sarkar hian CM a nihna aṭanga salary leh allowance a dawn te chu an party tan a hlan. Kum 2013 Tripura Assembly election-a a affidavit
aṭanga a lan dan chuan India rama chief minister rethei ber a ni.

Manik Sarkar leh a nupui Panchali Bhattacharya-te hian anmahni pualin in an nei lo a, car pawh an nei hek lo. A nupui hian vei vah nan Auto-rickshaw a hmang mai a, security guard hran pawh a nei chuang lo. India rama chief minister hlawh tlem ber a ni bawk. A nun dan mawlmang tak, khawsak sang si lo leh mi ngainat a hlawh em avang hian "cleanest and the Honest Chief Minister in the country" tia sawi hial a ni.