Rajkhowa-a'n Pul thih dan CBI chhui phut

Arunachal Pradesh Governor hlui Jyoti Prasad Rajkhowa chuan state chief minister hlui Kalikho Pul thih dan chu CBI chhuitir a phut thu a sawi.

Rajkhowa chuan, “Pul-a thih dan hian min ṭhawng takzet a, Indian politics-a thil thlengah chuan a rapthlak ber pawl a ni. A thih danah hian chanchin eng emaw zat ka dawng tawh a, a landanah chuan CBI chhui tir ngei chi niin ka hria" a ti. Governor chuan, Pul khan eng emaw hnutchhiah a nei tih sawiin, vantlang hriata puanzar a nih loh avangin mipuiten a thih danah rinhle;h tam tak an nei tih a sawi. A thih dan dik tak hriat a nih theih nan CBI inrawlh se a duh thu a sawi. Rajkhowa chuan Arunachal Pradesh Chief Minister Pema Khandu hnenah CBI-te chhuitir an nih theih nan ziaka a thlen tawh thu a sawiin, a chhanna tun thlenga a la dawn loh thu a sawi bawk.

AP Governor hlui Rajkhowa chuan, Pul-a hi mahni inawkhlum ngei a ni em tih chungchangah court chauhin thutlukna siam thei niin a sawi a, police te chu thutawp siamtu an ni lo, a ti. Pul hi Itanagar-a chief minister bunglow-ah August 9 2016 khan inawkhluma hmuh a ni. Hetih lai hian Jyoti Prasad Rajkhowa hi Arunachal Pradesh Governor a nih lai a ni.