Dalai Lama-a'n Ram pahnihte inṭhianṭhatna a tichhe thei : China

India-in Tibetan sakhaw puithiam Dalai Lama-a'n Arunachal Pradesh tlawh a phalsak chu China chuan a dem thu sawiin, ram pahnih te inkarah nghawng ṭha lo a neih theih thu kar kalta Zirtawpni khan a sawi.

Chinese Foreign Ministry thupuangtu Lu Kang chuan, “Dalai Lama-a'n Arunachal a tlawh tur hian nghawng ṭha lo tak a hring chhuak thei a ni, disputed area a ni a, hei hian China leh India inkara boruak ti sosangtu a ni thei a ni" a ti. China chuan Arunachal chu southern Tibet-ah rin lutin, India ram hruaitu lawkte tlawh a remtih loh mai bakah, foreign official-t'en an tlawh a remti ngai lo a, tun hma pawhin Dalai Lama ngei pawh hi a kal a rem tih loh thu a lo sawi tawh a ni. Dalai Lama hian Arunachal Pradesh Chief Minister Pema Khandu-a'n a sawm angin nakkum kum tir lamah Arunachal a tlawh dawn a, sorkar laipui chuan hemi chungchangah hian harsatna awm loh thu a lo sawi tawh a ni.

October 22 khan American Ambassador to India Richard Verma chuan Arunachal tlawhin, India leh China-in an rama an chhal ve ve Tawang a tlawh a, China chuan hei hi na takin a lo sawisel tawh bawk a ni. Dalai Lama hian Arunachal a tlawh a nih chuan Buddhist monastery awmna Tawang a tlawh ngei tura ngaih a ni a, hei hi China chuan a helh lawk hle.