Assam : Ram pawn mi thawnchhuah nan 1950 dan hmang dawn

Assam chief minister Himanta Biswa Sarma chuan state chhunga dan loa lut ram pawn lam mi hriatchhuah leh thawnchhuahna atan Foreigners Tribunal (FT) hmang loin, 1950-a dan siam tawh chu hman a nih tur thu a sawi.

Chief Minister Sarma chuan 1950-a dan hmang hian district commissioner te chu thawnchhuahna tur thupek siam vat turin a hriattir. Chief Minister chuan, Supreme Court-a Constitution bench-in Clause 6A chungchanga hearing a neihnaah, Assam chuan ram pawn lam mi hriatchhuah leh a thawnchhuah kawngah court rorelnaa thlen zel a ngaih loh thu a sawi.

Sarma chuan dan awmsa, 'Immigrants Expulsion Order' chu district thuneituten an hmang thei a, hemi chungchang hi ukil ten an sawilan loh avangin tun hnaiah an hriatchhuah thu sawiin, tun aṭang chuan hman a nih tawh dawn tih a sawi a ni. Ram pawm lam mi state chhunga dan loa pemlut an tam tawh thu sawiin, hmalak vat a nih loh chuan an pung zel dawn a, mi tupawh ram pawn lam mi an ni tih an hriatchhuah an nih chuan, court thu ngaichang loin hmalak a ni tawh dawn a ni, a ti.

Assam hian Foreigners Tribunals (FT) 100 nei mekin a hmasa ber hi 2005-a din a ni. He tribunal hi citizenship status hriatna atana hman ṭhin a ni a, a bik takin Bangladesh mi state chhunga dan loa pem lutte hriatchhuah na atan hman ṭhin a ni.