Congress hruaitu lu pahnihin Manipur party hruaitute hmu

Congress party hruaitu pahnih, president Mallikarjun Kharge leh Lok Sabha-a Leader of Opposition LoP Rahul Gandhi te chuan Ningani khan Manipur-a an party hruaitute an hmu a, state dinhmun an sawi ho.

Meeting an neihah hian Congress general secretary K.C. Venugopal leh Manipur All India Congress Committee (AICC) in-charge, Saptagiri Ulaka, leh Pradesh Congress Committee president Keisham Meghachandra Singh te bakah Manipur-a party hruaitu enge maw zat an tel.

Venugopal chuan kum hnih liamta aṭang khan state chhungah buaina a thlen tawh thu sawiin, he buaina chingfel tur leh nunphung pangngaia an kir leh thuai theihna tura hmalak a ṭul thu meeting an neih zawhah X-ah a tarlang.

Meeting hi BJP MLA ten sorkar laipuiin February 13-a President's Rule a puan hnua sorkar pangngai din leh an duh thu an sawi hnuah neih a ni. May 28 khan BJP MLA pariat leh National People's Party MLA pakhat bakah Independent MLA pakhatte chuan Raj Bhavan, Imphal-ah governor Ajay Kumar Bhalla hmuin, state chhungah sorkar mumal din a ngaih thute an lo sawipui a, sorkar an siam theih thu pawh an thlen a ni.

Manipur-a chi leh chi inkara buaina a chhuah hnuah Congress party chuan prime minister Narendra Modi chu Manipur tlawh a, tualchhung buaina avanga mipui hrehawm tawrhna te hriatpui turin an lo phut fo tawh a ni. Sorkar laipui chu buaina chinfel tum tak taka inrawlh tum loah an puh.